Акафист Пресвятой Богородице перед Ея иконой, именуемой «Нерушимая стена»

Кондак 1
Избранней от всех родов Божией Матери и Царице, пред пречистым Ея образом, Нерушимая Стено именуемым, благодарственное хваленное пение приносим Тебе, Благодатная. Ты же, яко имущая силу непостижимую и любовь несказанную, от всех нас бед и скорбей сохрани, да зовем Ти: Радуйся, Богородице, Стено Нерушимая, Заступнице наша и утешение.
Икос 1
Ангел предстатель послан быстъ от Бога к Тебе, Пречистая, благовестити Тебе радость всемирную, яко зачнеши от Духа Свята во утробе Твоей Бога Слова, Спасителя мира. Мы же, ведуще исполнение сего благовещения, веруем, яко Господь Тебе, Преблагословенная, яви Стеною Нерушимою и ограждение нас от всякого греха, бед и напастей. Сего ради ублажаем Тя, Богородице, и радостно вопием: Радуйся, яко Господь с Тобою и Тобою с нами; радуйся, яко в Кане Галилейстей Предстательницею к Сыну Твоему о людех явилася еси. Радуйся, яко омофором Твоим ширше облака покрываеши верных; радуйся, яко лентием Твоим слезы страждущих отираеши. Радуйся, яко воздеваеши руце Твои во ограждение нас от всякия скверны; радуйся, яко по глаголу Твоему ныне и присно ублажаешися. Радуйся, Богородице, Стено Нерушимая, Заступнице наша и утешение.
Кондак 2
Провидяще пророцы умными очесы своими благодатное явление Твое, Рождество во плоти от Тебе Сына Божия провозвестиша, да вси сбытие пророческих вещаний познавше, благоговейно взывают к Богу: Аллилуиа.
Икос 2
Разум благопросвещен имеюще, Иаков, Моисей, Давид и других множество в словесех, видениях, сониих чудное Рождество Твое и тайну Приснодевства Твоего изобразиша. Мы же, всю силу пророческих вещаний разумети не могуще, из глубины верующих сердец наших с любовию воспеваем Тебе: Радуйся, Лествице высокая, землю с Небом совокупльшая; радуйся, Бога, на земле явльшагося, во чреве Твоем понесшая и яко Неопалимая Купина нетленною пребывающая. Радуйся, светоносный Облаче, из Него же всех Владыка, яко дождь на руно, на землю сниде; радуйся, яко Живоносный Источник, алчбу и жажду вечныя правды в людех возгревающая. Радуйся, Христа, манну жизни, во чрево Свое вместившая и души наша хлебом безсмертия насыщающая; радуйся, чудный Жезле, цветами добродетелей верных украшающая. Радуйся, Богородице, Стено Нерушимая, Заступнице наша и утешение.
Кондак 3
Сила Вышняго осени Тя, Пречистая, соделавши Тя Матерью Господа, и по Рождестве Твоем обильно пребывает в Тебе, Богомати. Радующеся таковому Божию благоизволению, к Тебе бывшему, вси, восхваляюще Спасителя мира, вопием Ему радостно: Аллилуиа.
Икос 3
Имущи в Себе обильно благодать Божию, Ты, Пренепорочная, все житие Твое отдала еси благим попечениям о Сыне Твоем и Господе, вся глаголы Его соблюдающи в сердце Своем. Мы же, грешнии, скорбное житие Твое на земли воспоминающе, глаголем Тебе похвалы таковыя: Радуйся, Владыку вселенныя во убозем вертепе родившая; радуйся, во Египет от беззаконнаго Ирода с Сыном Твоим бежавшая. Радуйся, Отрока Сына Своего с великою скорбию во Иерусалиме во дни Пасхи искавшая; радуйся, ненависть и зависть к Сыну Твоему от врагов Его скорбным сердцем созерцавшая. Радуйся, Материнским сердцем сраспинавшаяся Ему, егда Крестная страдания и смерть Его на кресте созерцала еси; радуйся, во Иоанне Богослове сына Себе по глаголу Иисуса обретшая. Радуйся, Богородице, Стено Нерушимая, Заступнице наша и утешение.
Кондак 4
Бурею нашествия иноплеменников многократно испытуема страна наша Российская, и в тяжелых испытаниях отцы наши взываху о помощи ко Пресвятой Деве Богородице. Та бо, яко Нерушимая Стено, Своим предстательством у Престола Сына Своего и Бога, благодатно ниспосылает силу Свою, и с надеждею на помощь Богоматере люди русстии изгоняют полчища вражеския от пределов российских. Сего ради восхваляюще Богоматерь, радостно воспеваем Господу: Аллилуиа.
Икос 4
Слышит и знает весь мир, яко Пресвятая Богородица возжигает в сердцах русских людей мужество, и силу на подвиги и защиту отечества, боримаго от иноплеменников, подает, и помощь Свою благодатную посылает всему воинству русскому. Исповедующе таковую веру нашу и чудесное заступление Царицы Небесныя во дни бранных нашествий на землю нашу, тако воспеваем Благодатней: Радуйся, народу русскому на врагов поможение; радуйся, земли нашей на изгнание иноплеменников благодатное подкрепление. Радуйся, вождей воинства русскаго тайное вразумление и умудрение; радуйся, ненавистников рода человеческаго посрамление. Радуйся, пламень вражды разжигающих грозная Наказательнице; радуйся, всех пекущихся о мире всего мира необоримая Помощнице. Радуйся, Богородице, Стено Нерушимая, Заступнице наша и утешение.
Кондак 5
Боготечная звезда явилася еси, Присноблаженная, всем блуждающим во тьме страстей и пороков, Твоим бо вразумлением множество и тяжких грешников от беззаконных дел отвращаются и к Богу с покаянием прибегают, вопиюще Ему: Аллилуиа.
Икос 5
Видящи Премилосердая Владычица гибель душ многих, во власть греха и скверны сатаною исхищенных, по неизреченной любви к роду человеческому предваряет их на помощь, от пути гибельнаго отвращает и на путь спасения наставляет. Радующеся дивному милосердию Царицы Небесныя, вси вернии тако глаголют: Радуйся, путь спасения всем нам показующая; радуйся, гордости и гневу сердцами нашими владети возбраняющая. Радуйся, чревоугодником и пияницам строгое вразумление; радуйся, ленивым и безвольным крепкое побуждение. Радуйся, живущих блудно к покаянию приводящая; радуйся, грешников, к Тебе с верою прибегающих, скорое исправление. Радуйся, Богородице, Стено Нерушимая, Заступнице наша и утешение.
Кондак 6
Проповедницы быша чудес, от Твоих икон явленных, благочестивии отцы наши, Тобою, Богородице, спасенныя и от бед и напастей избавленныя. Темже благодаряще Бога, таковую благую Заступницу роду человеческому даровавшаго, вси немолчными усты воспевают Ему: Аллилуиа.
Икос 6
Возсия свет неизреченньй Твоея благости, Благословенная, всем скорбящим, плачущим, всем нам, во искушении сущим, ибо чрез наша слезныя молитвы даруется нам Тобою, Богородице, чудесное от бед избавление. Обаче не имеюще словес достойных восхваляти Тя за милости Твоя ко всем, грешными усты восклицаем Ти во умилении тако: Радуйся, скорби и слезы наша в радость претворяющая; радуйся, изнемогающим во искушениях Милосердная Помощнице. Радуйся, домы наша от огня и иных разрушений спасающая; радуйся, от татей и злых людей верныя ограждающая. Радуйся, клеветы и козни врагов наших разрушающая; радуйся, страх смерти и внезапныя кончины в душах наших побеждающая. Радуйся, Богородице, Стено Нерушимая, Заступнице наша и утешение.
Кондак 7
Хотя Всемилостивый Господь явити Свою Божественную любовь к нам недостойным, дарова нам Твою, Богомати икону, Стено Нерушимая именуемую, да видящии чудеса, от святыя иконы бывшая, вси людие с верою и надеждою на чудодейственную Твою помощь со умилением взывают Источнику чудес Господу: Аллилуиа.
Икос 7
Новое свидетельство присущия всегда Тебе, Пречистая, благодати и чудесныя силы показа нам Создатель, егда дивный образ Твой, на алтарней стене древняго Софийскаго собора во граде Киеве изображенный, девять столетий неврежден сохрани, полчища бо поганых врагов веры православныя не дерзнувше повредити образ сей благодатный, силою Твоею охраняемый. Воистину и нам, грешным и скорбным, Стеною Нерушимою является святая икона сия, всем верным внушающая возглашати Тебе: Радуйся, облеченная в хитон, сияющий светом небесным; радуйся, воздеянием рук Твоих пречистых непрестанную молитву о всем мире являющая. Радуйся, яко честнаго образа Твоего и долгота веков не повреди; радуйся, яко образ сей и по нашествии силы вражия во всей своей лепоте пребывает. Радуйся, яко образом сим сердце молящихся благоговейно умиляется; радуйся, яко благодатная сила, сему образу Твоему присущая, бесы устрашает. Радуйся, Богородице, Стено Нерушимая, Заступнице наша и утешение.
Кондак 8
Странно есть неверующим слышати, яко Ты, Богомати, о младенцех особое попечение имаши. Мы же, воспоминающе слова Господа нашего, рекшаго: оставите детей приходити ко Мне, таковых бо есть Царствие Божие, с твердою верою исповедуем, яко Ты, Пресвятая Дево, Своею любовию охраняеши младенцев и их матерей, и вопием Сыну Твоему: Аллилуиа.
Икос 8
Всем сердцем Твоим, Царице мира, всякое Божие создание любяще и о всех к Сыну Твоему молитвы возносиши, яко Мати по плоти Сына Божия, Ты нетесно вмещаеши в душе Твоей скорби и труды матерей. Сего ради, яко Матери Богомладенца Иисуса, воспеваем Ти: Радуйся, верная Помощнице и прибежище матерей деторождающих; радуйся, покрове и крепосте младенцев. Радуйся, материнския скорби утоляющая; радуйся, всяк возраст младенческий сохраняющая. Радуйся, благочестивых матерей в воспитании детей благая Наставнице; радуйся, младенцев безпомощных в болезни Целительнице. Радуйся, Богородице, Стено Нерушимая, Заступнице наша и утешение.
Кондак 9
Всякое естество ангельское и человеческое воспевает приснодевственную чистоту Твою, Пренепорочная, сего ради почитаем Тя, яко неусыпную Попечительницу непорочности дев, чистоты вдовиц, целомудрия юношей; и всяк возраст людей вверяем Тебе, да сохраниши их в святости, воспевающих Сыну Твоему: Аллилуиа.
Икос 9
Вития суемудреннии не могут в сердце своем вместити истину Твоего, Богородице, Приснодевства. Мы же, верующе в силу непостижимыя тайны, с благоговением восхваляем Тя сице: Радуйся, яко красныя и светлыя доброты Твоея возжела Жених, краснейший паче всех сынов человеческих; радуйся, яко сей Жених девство и рождество в Тебе сочета. Радуйся, премудрая Наставнице непорочнаго девства; радуйся, вдовиц благочестивых в безбрачии соблюдающая. Радуйся, чистых дев и вдовиц работати во славу Христа на благо ближних наставляющая; радуйся, всем могущим сия вместити на пути целомудрия споспешствующая. Радуйся, Богородице, Стено Нерушимая, Заступнице наша и утешение.
Кондак 10
Спасти хотящи люди Своя от падений греховных, Ты, Владычице, неусыпно святость честнаго брака охраняеши и пребывающим в браце указуеши хранити заповеди Господни: дети своя по Богу воспитывати и к делом милосердия приучати. Благодаряще Бога, даровавшаго нам таковую мудрую Наставницу, от всего сердца поем Ему: Аллилуиа.
Икос 10
Стена еси и Хранительница христианских семейств благочестивых, Пресвятая Дево, верующих мудро наставляеши брачную жизнь яко иго благое приимати и верность друг ко другу до кончины хранити. Сего ради и мы, радующеся Твоему попечению о добрем христианстем супружестве, тако с умилением Тебе глаголем: Радуйся, честный брак благословляющая; радуйся, по учению Христа и апостолов жити супругов наставляющая. Радуйся, живущим в супружестве любовь и единомыслие в сердца влагающая; радуйся, семейныя узы охраняющая. Радуйся, благая Попечительнице домашния Церкве; радуйся, грозная Обличительнице нарушителей супружеския верности. Радуйся, Богородице, Стено Нерушимая, Заступнице наша и утешение.
Кондак 11
Пение всеумиленное приносит Ти, Преблагословенная, весь род христианский, видяще Тя, яко всесильную Молитвенницу за весь мир. Ты же, Богородице, и юных молитвы приемлеши, и моление немощных старцев и стариц не презираеши, юных на добрыя дела ко спасению наставляеши, старцем же о скором их преселении в жизнь загробную напоминаеши. Сего ради, моляще Господа о даровании всем нам памяти смертныя, взываем Ему: Аллилуиа.
Икос 11
Светилом назидательным и светозарным в нашей греховной жизни, учение Христа Спасителя о жизни будущаго века, является, Ты же, Всемилостивая, возгреваеши в сердцах наших благодатное желание от грехов покаянием очиститися и добрыми делами жизнь свою украсити. Радующеся Твоему о нас попечению, о еже получити нам вечное спасение, со слезами умиления взываем Ти: Радуйся, изрядную любовь к старцем немощным являющая; радуйся, верным людем, хотящим житие свое во благочестии скончати, Всеблагая Помощнице. Радуйся, престарелых родителей, детьми своими оставленных, под кров Свой честный приемлющая; радуйся, таковых жестоких чад, небрегущих о старцех своих, грозная Наказательнице. Радуйся, о страшнем Втором Христовом пришествии всем нам напоминающая; радуйся, о душах преставльшихся верных рабов Божиих Молитвеннице теплая. Радуйся, Богородице, Стено Нерушимая, Заступнице наша и утешение.
Кондак 12
Благодать Божественная явно пребывает в Твоей чудотворней иконе, достойно и праведно в утешение наше Стеною Нерушимою именуемою. Изливающе пред сею иконою своя радости и печали, молим Тя, Мати Господа нашего Иисуса Христа, не остави нас Своим заступлением, да благодарно о Тебе взываем Господу: Аллилуиа.
Икос 12
Поюще Твое мощное предстательство за весь мир, воспоминающе чудеса, явленная Тобою чрез святую икону Твою Стено Нерушимая, молим Тя, Заступнице усердная: буди стране нашей непрестанная Помощница, умоли Сына Твоего, исполняющаго моления Твоя, водворити во всем мире желанный народами мир, да вси благодарно восхвалют Тя сице: Радуйся, явлением Сына Своего и Его Воскресением обрадованная; радуйся, в безсмертнем Успении Твоем душу Твою радостно в руце Его предавшая. Радуйся, пастырей добрых на их крестнем пути укрепляющая; радуйся, проводящих иноческую жизнь незримое поможение. Радуйся, храм сей и молящихся в нем благодатию Своею охраняющая; радуйся, отечеству нашему неизменный Покрове и Стено Нерушимая. Радуйся, Богородице, Стено Нерушимая, Заступнице наша и утешение.
Кондак 13
О Всепетая Мати Господа нашего Иисуса Христа, приими ныне сие малое моление, огради нас от грехов и всякия скверны, избави от находящих на нас бед и нужд, сохрани от уныния и отчаяния, клеветы человеческия, болезней нестерпимых, да молитвами Твоими ставше на путь спасения вечнаго, благодарно воспоем Сыну Твоему: Аллилуиа.